illustrissim navigadoo

Semm rivat anche numm coi noss machinet sul www de l’internet.

 Ormai es po più fann senza, insci as femm cognoss e i client i ved quel che femm.

 Semm mia di scimm ma as femm capi  in talian, todesc, frances e anca in ingles.

 

Però em decidu da fa i ropp a la bona. Senza trucc e truchitt che it fà domà pert el fil.

 

Se tit ciapet el temp de clicà un po’ dapertutt  ti vedrè che a butom là una sfilza de idei

e machinari, ma, sia che ti trovet o no quel che ti cerchet

 at domandom istess de vegni in negozi o in officina.

 (semm vert dai set e mezza ai ses de sira, el sabet fin mescdì e i postegi i manca mia).

 

A femm insci perché a semm persuas che domà de persona

l’è posibil capi quel che at serviss, cata fö la machina tra i diversi marc,

 ciapala in mann, smontala, met su e tira giu la lama o la cadena

 cambià el fil e i bocol de la testina, inviala da frecc o cambià la candela.

 

Un attrezzo di nos, növ o d’ocasion,  che al sia na motosega, un tajaerba,

un spaccalegna o na fresa da la nev,  sem convint el dev vess adatt ai to bisögn,

ai to capacità  e a quel che get in ment da fa e da spend.

 In più el servizi: visin, onest, in pressa e coi ricambi originai.

 

Trovada quela giusta, intant che discutom sul prezi e as dem la man, 

in officina it la prepara, pronta per doprala, pö at spiegom come la funziona

e at la femm inviaa, a la fin at la metom in del baul o at la portom a ca.

 

Se invece es trata de na machina da riparaa, at scoltom, guardom insema quel che ghè da fa,

se var la pena metig adoss i man o se l’è ora da cambiaa.

Se ghè bisogn vegnom a ca toa a tola e quand l'è pronta at la portom anca indré.

 

Preparas anca a senti na ramanzina, quela sui misur de protezion, sia sui machin

che personai: guai a tiraa via un fermo de sicurezza o inviaa una motosega

senza casco, scarpon e calzon antitaglio.

 

I mecanic jè bravi anca a inventaa,

met su un motor su un argan, taca la na pompa e un serbatoi,

scurtaa una lama, slonga un telar, fa su un carett,

metig na griglia e tut el rest che es po faa.

 

Coi pezzi de ricambi l’è pocc quel che riesciom mia a trovaa

se u ghè mia subit in magazin in un para da di l’è scià.

 

E tut col piasé da fa do parol insema, el fen sul magges, tratà la vigna, zapa l’ort,

la luna negra, poda i piant de fruta, castegna o fò per el camin, fa lus quand la va via,

el camoss ciapat in Verzasca o el lüsc bocat a Magadin. 

 

Ecco perché su quel sito chi ghè mia de carell,

nè Paypal, nè PIN, nè Code, nè password nè tanti altri ball,

ghè mia bisogn perché at spetom a Minus, tra la Verbanella e l'asnin,

tacat al Fontile sota do gran bandier bianc e ross

con su scritt Honda: de motor e machin industriai e da giardin el produtor pusee gross.